രാജ്യത്ത് രോഗവ്യാപന തോത് ഉയരുന്നു; കൊവിഡ് ബാധിതര്‍ അരലക്ഷം കടന്നു, മരണം 1783 ആയി

ദില്ലി: രാജ്യത്ത് കൊവിഡ് രോഗവ്യാപന തോത് ഉയരുന്നു. കേസുകള്‍ ഇരട്ടിക്കുന്നത് 12 ദിവസത്തില്‍ നിന്ന് 11 ദിവസത്തിലൊരിക്കലായി എന്ന് ആരോ​ഗ്യ മന്ത്രാലയം അറിയിച്ചു. അതേസമയം, രാജ്യത്തെ കൊവിഡ് ബാധിതര്‍ അരലക്ഷം കടന്നു. 52952 പേര്‍ക്കാണ് വിവിധ സംസ്ഥാനങ്ങളിലായി രോ​ഗം ബാധിച്ചത്. ഇതില്‍ 1,783 പേര്‍ മരിച്ചു. രാജ്യത്ത് ​ഇതുവരെ 15,266 പേര്‍ക്ക് രോഗം ഭേദമായി. നിലവില്‍ 35902 പേരാണ് ചികിത്സയിലുള്ളത്. 24 മണിക്കൂറിനിടെ 89 പേരാണ് രാജ്യത്ത് കൊവിഡ് ബാധിച്ച്‌ മരിച്ചത്. മഹാരാഷ്ട്രയിലാണ് ഏറ്റവും കൂടുതല്‍ കൊവിഡ് ബാധിതരുള്ളത്. ഗുജറാത്ത്, ദില്ലി, തമിനാട് എന്നീ സംസ്ഥാനങ്ങളാണ് രോ​ഗബാധിതരുടെ എണ്ണത്തില്‍ മഹാരാഷ്ട്രയ്ക്ക് തൊട്ടുപിന്നിലുള്ളത്.അതേസമയം, ബുദ്ധപൂര്‍ണിമദിനത്തില്‍ പ്രധാനമന്ത്രി നരേന്ദ്രമോദി രാജ്യത്തെ അഭിസംബോധന ചെയ്തു. രാജ്യം പ്രതിസന്ധി ഘട്ടത്തിലൂടെ കടന്നു പോകുന്ന ഈ സമയത്ത് മാനവസേവനത്തിനായി മുന്നിട്ടിറങ്ങിയവരെ അഭിനന്ദിക്കുന്നതായി പ്രധാനമന്ത്രി പറഞ്ഞു. ഇപ്പോഴത്തെ പ്രതിസന്ധിക്കെതിരെ നമ്മുക്ക് ഒന്നിച്ചു പോരാടാം. നി‍ര്‍ണായകമായ ഈ ഘട്ടത്തില്‍ നമ്മുക്ക് കൊവിഡ് പോരാളികള്‍ക്ക് നന്ദി പറയാമെന്നും മോദി പറഞ്ഞു.